Laerskool Totius

Die skool is op 9 April 1951 met 150 leerders en vyf onderwyseresse in ses losstaande klaskamertjies begin. Destyds het dit Voorbereidingskool Boston geheet, en is leerders net tot graad 3 geakkommodeer.

Gedurende die tydperk April 1951 tot Desember 1953 was Voorbereidingskool Boston besig om die fondamente te lê waarop Totiusskool sedert 1 Januarie 1954 begin verrys het. Met die afsterwe van prof. J.D. du Toit (Totius), godgeleerde, Bybelvertaler, digter en volksman, in 1953 is besluit om die skool na hom te noem.

In Januarie 1954 het dit Totiusskool geword. In dieselfde jaar is toestemming van die departement van onderwys verkry om die skool in ´n laerskool te verander, en elke jaar het een graadgroep bygekom.

Weens beperkte ruimte in die tydelike skoolgeboue is leerders en onderwysers in twee groepe verdeel, en onderrig is in dubbelskofte aangebied. Een groep se skooldag het van 08:00 tot 13:30 geduur, en die ander s’n van 12:00 tot 16:30.

Die hoeksteenlegging van die nuwe skoolgebou, soos dit vandag nog daar uitsien, is op 5 Mei 1955 gedoen. Op 28 November 1956 is die nuwe skoolgebou ingewy. Dr. J.G. Meiring, superintendent-generaal van onderwys in Kaapland, het die skool geopen. Dr. Meiring het tydens dié geleentheid aanbeveel dat, aangesien die skool na Totius heet, die laaste vers van Psalm 91, wat deur Totius berym is, die skool se Psalm moes word.

Die volgende hoofde het die skool gedien:

• Dr. P.K. Cronje 1951–1959
• N.J.I. v.d. M. Visser 1960–1963
• J.C. Visser 1964–1969
• I.W. van Rensburg 1970–1978
• A. d´L. Volschenk 1978–1983
• J.D. Rossouw 1984–1996
• G.C. van Zijl 1997–2014
• H.L. Bester 2015  –